هەرگیز مرۆڤایەتى ناوى زێمێل وایز لەبیر ناکات، چونکە ئەم پزیشکە بوو، کە ١٠٠ساڵ لەمەوبەر، بۆ یەکەمجار پێشانیدا، کە شۆردنى دەستەکان، رێگە لە تەشەنەکردنى نەخۆشى دەگرێت.
دکتۆر زێمێل وایز، لە نەخۆشخانەیەکى ڤییەننا کارى دەکرد. لەم نەخۆشخانەیە، رێژەى مردن لە بەشى لەدایکبوون ئەوەندە بەرز بوو، کە نەخۆشەکان داوایان دەکرد بگەڕێنەوە ماڵى خۆیان. زۆربەى ئەو کەسانەى کە گیانیان لە دەست دەدا، بەهۆى ئەو خوێندکارانە دەرمان دەکران، کە بەرلەوەى بچنە ناو بەشى لە دایکبوون، بەشدارییان لە وانەى هەڵوەشانی جەستە دەکرد.
لەبەر ئەوەى کە ئەم خوێندکارو پزیشکانە، دەستیان لە جەندەک(کەلاک)ى مرۆڤ دەداو پاشان بەبێ ئەوەى دەستى خۆیان بشۆن، کارى نۆڕینى نەخۆشەکانى بەشى لەدایکبوونیشیان دەکرد، بەکتریاى پاتۆژێن یان لە مەیتەکان بۆ دایکەکان دەگواستەوە.

 

 

 

 

 

 

 

 

 

دکتۆر زێمێل وایز، پێیداگرت کە دەبێت خوێندکارەکان، بەرلەوەى بچنە بەشى لەدایکبوون، دەستەکانى خۆیان بە باشى بشۆن. ئەمەشیان رێژەى مەرگى لەم بەشە دابەزاند و ئەم کردارە، یەکەم هەنگاوى کۆنتڕۆلکردنى گەندژین(چرکین، کێماوى، عفوونەت) بوو.
ئیتر لەوە بەدووا، شۆردنى دەستەکان، بووە بنەمایەکى سەرەکى لە پاراستنى تەندروستى، نەک تەنیا لە ناوەندە تەندروستییەکان، بەڵکوو لە لاى هەر تاکێکى کۆمەڵگا.
گومان لەوەدا نییە، کە هەردوو دەستی مرۆڤ کە ئامێرى کارکردنى رۆژانەن، لەبەر ئەوەى کە لە هەموو ئەو شتانە نزیک دەبنەوە، کە مرۆڤ پێوەندیی پێوە هەیە، بۆیەش بە یەکێک لە ئالوودەترین شوێنەکانى لەشى مرۆڤ دەژمێردرێن. کەواتە پێویستە رۆژانە چەندینجار بە باشى بشۆردرێن. هەروەها پێویستە تا دەکرێت، دەستەکان نزیک ئەو شوێنانەى لەش نەکرێنەوە، کە دەبنە رێگەیەک بۆ دزە کردنى میکڕۆب و ڤایرۆس بۆ ناو لەش. وەکوو دەمو چاوو لووت و تەنانەت پێستیش.

سەرچاوە زانیاری گشتی